Greqia ka instaluar një gardh dhe sistem vëzhgimi 40 km (25 milje) në kufirin e saj me Turqinë mes shqetësimit për një rritje të emigrantëve nga Afganistani.

“Ne nuk mund të presim, duarkryq, për një valë të mundshme refugjatësh” në tha Ministri i Mbrojtjes së Qytetarëve të Greqisë Michalis Chrisochoidis në një vizitë në rajonin e Evros, shkruan BBC, transmeton portal arbresh.info

“Kufijtë tanë do të mbeten të paprekshëm”, shtoi ai.

Komentet e tij erdhën ndërsa Turqia u bëri thirrje vendeve në Europë që të marrin përgjegjësi për emigrantët afganë.

Në një bisedë telefonike me Kryeministrin grek Kyriakos Mitsotakis, Presidenti i Turqisë Rexhep Tajip Erdogan tha se numri në rritje i njerëzve që po largohen nga Afganistani mund të përbëjë “një sfidë serioze për të gjithë”.

“Një valë e re migrimi është e pashmangshme nëse masat e nevojshme nuk merren në Afganistan dhe në Iran,” tha Erdogan.

Greqia, e cila ishte në vijën e parë të krizës së emigrantëve në vitin 2015 kur më shumë se një milion njerëz që iknin nga lufta dhe varfëria në Lindjen e Mesme kaluan nga Turqia në BE, ka thënë se mund të kthejë mbrapsht çdo afgan që mbërrin ilegalisht nëpër vend./arbresh.info/